Asturtsalia: Pastor Vega Tembrás, quintu na guerra Melilla (2ª Parte)

En plenu procesu de reagrupamientu de tropes por tola xeografía española, por orde del Xeneral Subinspector de la 8ª Rexión, el soldáu Pastor Vega Tembrás abandonaba'l 23 d'agostu el Reximientu Zamora 8 siendo incorporáu 4 díis más tarde a la 4ª Compañía del 2ª Batallón del Reximientu d'Infantería Príncipe Nº3 asitiáu n'Uviéu. Por delantre queden dellos díes de guarnición ya instrucción mentantu siguen aportando más tropes. Finalmente, el 10 de setiembre sal el convoy dende Uviéu con destín Málaga, puertu d'enllaz ente la península y Melilla. Lleguen les tropes a Málaga el día 12 embarcando de la mesma nel vapor Alfonso XII que sal rumbu a Melilla aportando al díi siguiente. Un díi más tardará en llegar otru vapor de la Transmediterranea, el Ciudad de Cádiz, nel que venía tola plana mayor. Queda'l reximientu acampiáu nel campamentu de "Cabrerizas Altas".

El exércitu español en Melilla suma ya unos 40000 efeutivos, colos que plániase una ofensiva cola intención de conquistar la mayor parte de la península de Tres Forcas. Nos díis 20 y 21 de setiembre entamen les tropes del reximientu astur a participar nes operaciones militares, prestando servicios de sofitu de les columnes que avancen sobre Tasdirt, dando-i cobertoria a les bateríes artilleres que protexíen l'avance de la división Tovar.

El 22 llega la primer aición ofensiva, al tomar parte na conquista de la posición nomáa Zoco El-Had de Beni Sicar dientro de la división Sotomayor. El reximientu marcha en vanguardia, sofriendo los primeros ataques nos altores de Hayara-Muna. Superaes les primeres torgues al so avance, algamen la posición de Zoco El-Had, au les fuercies rifeñes presenten fuerte resistencia que nun impiden que a la fin la posición caiga nes manes del exércitu español. El reximientu permanez a la defensiva na posición. El gruesu les tropes caltienense nel campamentu asitiáu nel mesmu zocu mentantu que la 1ª Compañía del 1er Batallón ocupa un reductu avanzáu al norte del mesmu. Esta posición pasará a la hestoria militar de la campaña por ser el llugar nel que perdió la vida el gran heroe d'esta guerra, el asturianu cabu Luis Noval. La estratexa colonial española en Marruecos fasta'l desastre d'Annual basábase en disponer campamentos principales nos que s'acantonaben les tropes, semando dempués tola rodiada con puntos defensivos nomaos blocaos, pequeñes posiciones fortificaes con sacos terreros y pequeñes muries de piedra asina comu allambraes, ocupaos normalmente por pequeños destacamentos que munches vegaes nun sumaben más de cuatru o cincu homes. Acincaos en puntos dominantes de caminos y valles, taben demasiaes vegaes allonxaos de les aguaes, ya a tala distancia un d'otru que, atacaos por fuercies muy superiores, diben cayendo un tres d'otru ensin que hubiere tiempu de socorrelos. Asina pasó en 1921 en Annual, nun desastre que fexo que blocau tres blocau, ya los mesmos campamentos, foran cayendo un tres d'otru, dexando tres de sí munchos miles de soldaos muertos.

Representación d'un combate dientru un blocau

Na madrugá del 28 de setiembre, les posiciones del reximientu son atacaes por fuercies de la harka de Beni-bu-Ifrur y de Alhucemas. Les tropes mores (unos 1500 homes) arrodien el campamentu ya'l reductu. Quieren poner en práutica la so táctica d'averase a les posiciones españoles ensin ser detectaos pa asaltiales dende les mesmes trincheres, pero siendo detectaos poles patrulles de vixilancia entámase la griesca con fueu de fuselería entrambos bandos. Los combates caltienense a lo llargo tola nueche, pero al alborecer la primer compañía llanza un ataque que termina por esbaratar l'ataque rifeñu. Nos combates ambos contendentes sofrieron delles baxes. Nel reximientu Príncipe alrodiu los 25, ente muertos y feríos. El númberu de rifeños ye imposible de calcular pues yera vezu d'ellos el arramplar colos sos caíos en combate a fin de dayos sepultura acorde'l ritu musulmán.

El 1 d'ochobre el reximientu ye relevau, marchando el segundu batallón al campamentu de Hayara-Muna, au tien el so cuartel xeneral el Xeneral Sotomayor. Equí atopamos discrepancies ente documentos de la hestoria oficial del reximientu ya'l hestorial militar del soldáu Pastor Vega. Dexándonos llevar pol caberu, el segundu batallón permanez acantonáu en Hayara-Muna au tien de repeler ataques rifeños los díis 5, 20, 21 ya 22 d'ochobre, los tres caberos fechos baxu un fuerte temporal, que finaron con más d'una docena feríos. Refugaos los asaltos el batallón ye retiráu del frente ya unviáu a Melilla, al campamentu de Rostrogordo. Tres dellos díis de combates los soldaos abandonen les trincheres y les misiones d'escubierta pa les más llevaderes de campamentu ya escolta de convoyes. Una selmana durayos la paz, pues el 30 tornen a ocupar les posiciones de Zoco El-Had aunque nun sufren más ataques rifeños.

El 25 de payares, el segundu batallón ye unviáu a Nador au xúnese col batallón de cazadores de Barbastro formando una semibrigada al mando del Coronel Molo Sanz. Esta marcha cabezalera de la división Tovar pa tomar les posiciones d'Atlaten, lo que fain el 26, atrincherándose ya entamando a fortificar el llugar. Tres de ser relevaos tornen a Melilla, pasando lo que queda del añu ente los servicios de campaña en Rostrogordo y trabayos de guardia y fortificación en Zoco El-Had, Hayara-Muna y Mari-Guari. Namás fraña la rutina un serviciu estraordinariu, el 30 de payares, la 1ª y 4ª compañía del 2º batallón acompanguen al Coronel d'Estáu Mayor Jordana nun reconocimientu por territoriu enemigu ensin que se produza novedá dalguna. El 17 d'avientu declárase oficialmente finada la guerra.

L'aniciu de 1910, nos díis que van dende'l primeru xineru fasta'l 26 d'abril, ve a los soldaos faciendo llabores de fortificación y consolidación del territoriu. Llevántense blocaos, fainse caminos, organizase tou'l territoriu que dafechu queda baxo'l control del gobernador militar de Melilla. El 26 d'abril, siete meses dempués d'aportar al Africa marroquí, a bordu'l vapor Cataluña, sal el reximientu camín de Málaga, d'au vanse a Uviéu en convoy ferroviariu, desfaciendo asina el camín andau. El 30 ya tan n'Uviéu. El reximientu tien de pasar de nueves al so tamañu de tiempos de paz, desfaense entós delles compañíes, la 3ª y 4ª de ca batallón, amás de un tercer batallón completu fechu con reservistes que caltúvose acantonau n'Asturies. El 20 de mayu por fin pue tornar al so pueblu, gociando d'una llicencia illimitada, pa ser pasáu definitivamente a la reserva el 30 de xunetu. Munches güelgues dexaría-i ensin dubia esta esperiencia bélica, quedaran-i recuerdos, bonos y malos, dalgunos dolorosos, otros, quiciaes, vergoñosos. ¿Quién sabe? Eso ye lo que nunca nun apaez ni nes hestories oficiales nin nes fueyes de serviciu, son les coses que namás son a conocer, sicasi, los familiares más averaos, quizás dalgún collaciu, esa xente que la mi xeneración ya l'anterior, nun foron quien casique nin a conocer. Quedó una medalla, que nun se si llegó dalguna vez a recoyer, pola campaña del Rif, de bronce por ser soldáu de tropa, con cinta amariella y dos pasadores que remembraben los sos combates: Zoco El-Had y Atlaten.

La guerra queda atrás aunque'l Rif sigue siendo un polvorín, nel que se producen continuos altercaos ente fuercies españoles y rifeñes, entrando nuna paz candia que finará desendolcando na guerra más sangrienta de cuantes asocedieron cola ocupación de los territorios africanos, la que cola masacre de Annual, Arruit, etc... dará lluz a la España de Primo de Rivera, al fin de Alfonso XIII, ya'l ñacimientu d'una raza de militares dientro'l exércitu, los africanos, que dirán marcando'l destín de la nación durante varios decenios, los mesmos homes escontra los cualos llevantáronse los otros africanos, los probes, los que comu Pastor Vega foron obligaos y llucharon con valor, los camaraes d'aquellos que nun tornaron, los padres, fíos y hermanos d'aquellos que foron pasaos a cuchiellu pola traición y cobardía de los altos mandos que negociaron salvar la suya (3000 masacraos en Arruit). Caiga sobre la memoria de los escaecios l'almiración ya'l más fondu respetu. Pa los otros, los traidores y los verdugos la inorancia ya'l despreciu.