Guetar n'esti blogue

viernes, 30 de diciembre de 2011

El peligru de trabayar nun buque tanque....

      Delles vegaes escaecemos que la mar ye traidora o que el transporte de productos químicos y petrolíferos caltién un gran peligru pa la nuesa seguridá, pa la nuesa mesma vida. Esto ye lo que-i pasó a un barcu de la mi compañía tando descargando en Sandefjord, Noruega. Afortunadamente, naide salió feríu.


Y asina quedó....



Y ye que ya lo diz un vieyu poema mariñán nuna de les sos múltiples versiones:

A traveller knocked at the Pearly Gate.
His face was lined and old.
He stood before the man of faith
for admission to the fold.

"What have you done - Saint Peter asked - to deserve admission here?"
"I have been a tankerman - he said - for many a year."
The door swung wide and Saint Peter touched the bell.
"Come in good man - he said - you have had your lot of Hell."

Que más o menos vien ser...

Un viaxeru picó a la Puerta'l Cielu.
Tinía'l rostru engurriáu y vieyu.
Púnsose de pié enfrente'l Home la Fé
pal rexistru la so admisión.

¿Que ficisti - entrugoí San Pedru - pa solicitar la to admisión equí?
Fui tanqueru - respondiói - munchos años.
La puerta abriose de par en par y San Pedru tocó la campana.
Entra bon home - dixói - tú ya tuvisti la tu parte del Infiernu.

jueves, 8 de diciembre de 2011

Creyencies y supersticiones de la xente de mar


Nos estudios que se fain sobre’l home establecense delles etapes na evolución humana acordies con aspectos que van dende la mesma evolución fisiológica hasta’l desendolcu de la interación col mediu nel que vive. Asína vemos como el pasu del caminar simiescu al arrechu dio llugar al homo erectus, o como el entamu nel emplegu y el trabayu de ferramientes de piedra y güesu definió al homo habilis. Después vieno’l homo sapiens, cola so capacidá de ellaborar ferramientes más complicaes, falar o espresase artísticamente. De toos modos, toes estes divisiones puen xuntase n’una que define al home dende qu’esti atopó usu a la razón, el homo supersticiosu. Y ye que, al mio atalantar, el home pue comparase con un ser rodiáu de solombres ente les que nun ye quien acolumbrar un res. A midía que va proyeutando lluz alrodiu so, en forma el pensamientu críticu, la curiosidá, la observación, el estudiu ya’l razociniu, les solombres van alloñándose ampliando la fastera del conocimientu. Eses solombres, que guarden nel so sen lo desconocío, son la puerta d’entrá al mundiu les creyencies, les supersticiones y la ignorancia.

No obstante, el avance nel conocimiento del mediu que nos rodia nun ye abondo pa borrar les güelgues que estes solombres dexaron sobro un terrén munchos años baxo’l so reináu. Estes güelgues afinquense nel maxín humanu enraigoñaos cola cultura popular, los usos y las costumes, ocupando un llugar habitual nel trascurrir de les nueses vides. Dependiendo’l campu nel que nos movamos, el nuestru territoriu vital, les supersticiones sedrán unes u otres, y la so presencia tendrá mayor o menor vigor.

La mar, históricamente, asociase colo desconocío. La mar ye un medíu ayén al home. Un mediu terriblemente hostil a la so natura terrestre. El home pue construir barcos, pero estos tan merced a un mediu imprevisible nel que polos sos medios nun sedría quien a sobrevivir a curtiu plazu. El miéu atávicu que la mar infunde al home, al impar d’una atrayente fascinación, dio llugar a toa una triba de supersticiones y creyencias de les cuales munches entá puén atopase ente la xente mariñana bien enraigoñaes na so conducta: unes vegaes por tradición, otres por braeru convencimientu. De les munches que fui atopando a lo llargo les mios singlaures polos mares terrestres equí van unes cuantes.

Ritos de pasu

Na antropología conozse col términu de “ritos de pasu” a aquellos tiruales colos que un home o mujer camada el so status ante la so comunidá. Aquella mili que convertía a los nenos en homes, la cellebración de los 15 años que marca el pasu de una neña a una muyer nos países sudamericanos o dalgunos de los munchos rituales presentes nes cultures tribales d’Africa, Asia o América que marquen el pasu de la mocedá a la edá adulta son dalgunos de esos ritos. Na mar el “ritu de pasu” más enraigoñáu, y del que da bona cuenta el que pue ser el meyor y más importante escritor de temática marítima del mundiu anglosajón, William Golding, nun llibru entituláu asina mesmo, ye’l pasu’l ecuador ya’l bautizu por Neptuno.

Cuando un barcu pasaba’l ecuador camudando d’hemisferiu faciase una folixa a bordu na que tóo yera posible. Al pasar el ecuador Neptuno facía actu de presencia abordu, pasando dende esi intre a detentar el control de la situación, convirtiéndose en mayestru del ceremonial, nel que amás de dar cuenta d’una bona xinta y alcohol asgaya,  tinía llugar el ritu del bautismo, pol cual tolos tripulantes que cruciasen el ecuador por vez primera yeren bautizaos por Neptunu, el cual yos daba un nome acordies cola so personalidá, maníes o carauterístiques físiques. Nome que polo demás siempre taba enllenu de sátira, humor y mala llechi: “ballena marexá”, “besuguín del cantábricu”, etc.

Neptunu nun tinía por qué tar representao pol Capitán nin muncho menos. Solía ser dalgún tripulante con poco sentíu del ridículu y munchu de sorna, que antroxábase lo meyor que podía pa tener una prestancia de Dios marín. Les sos disposiciones, que hebíen de tar tomaes siempre dientro del bon humor y la diversión yeren de obligáu cumplimiento. Esi día el mesmu capitán pudiere ser oxetu de burlles y/o castigos, dientro unos llendes,  pola so desobediencia de la llei del dios del mar. El bautismu, imponiase a los implicaos aplicándoyos dalgún mexunxe fechu colos líquidos más inmundos que pol barcu pudieren atopase: aceite del motor, vinagre, grasa, agua de sentinas, etc.

Desgraciadamente, pol ranciu rigorismu que afeuta a la sociedá moderna esti tipu de ritos tan marcadamente mariñanes van desaniciándose poquitín a pocu.


Páxaros de mal agüeru

Cuando la mar ye capaz de destrozar un barcu fechu n’aceru cola facilidá cola que un nenu ye a aplastar un de papel, ye de entendese el que la xente que antiguamente cruciaba les mares metíos en carraquines de maera tuvierai braeru pánicu al temporal. Asina, el pasu d’una mar bonancible a la más gafa de les galeones tinía que debese siempre a dalguna cosa, a un gafe, un páxaru de mal agüeru que lo truxere con so o lo invocase. Esto foi desendolcando na apaición de toa una triba de pallabres, personaxes o aiciones tabús que por si mesmes o en comuña yeren a atrayer el temporal.

De fondo xeitu relixosu, entá nun hai barcu tripuláu por hispanos nel que la vires del Carme nun esparda la so presencia de Capitana nos puentes de mandu. Sin embargu, la presencia de cures a bordu nun sólo ta vetá comu invocaor de galernes y malos vientos. El meru fechu de la so mención ye abondo pa facer que a una persona sei camude’l xestu na so cara al pronunciar la pallabra “cura” nun alderique a la mesa después de xintar. Pa referise a ellos hay que emplegar términos comu ye el de “cuervu”.

Quiciaes la superstición referente al mal tiempu con mayor vixencia a díi de güei ye la prohibición de los paragües a bordu. Non sólo ye de llocos entrar na cubierta d’un barcu atracáu a puertu con un paragües desplegáu pa protexese de la lluvia, xestu col que traes la mala mar, sinon que tas arriesgándote a que dalgún de los mariñanes te lu arrample de les manes y lo tire pola borda. Aunque, la tenencia de paragües ente les tripulaciones ye algo totalmente normal, nun dexa de llamar la atención como, pesie a que llueva a mares, cuando tas en puertu nadie de tierra lo use al subir a bordu. Como muncho déxenlu plegáu nel muelle, al pie la escala.

El mal tiempo na mar refierese al viento y a les foles que trae con so, non a la lluvia o’l fríu. De dómines de la navegación a vela vien otra de les supersticiones más conocíes, la invocación al traviés del xiblíu. La creyencia de que los vientos podieren ser invocaos mediante xiblíos nun tien sólo connotaciones negatives. Nel casu de la navegación a vela, el xiblar con vientos bonancibles yera llamar a la tormenta, pero si se facía demientres les encalmaes yera’l mediu pa que tornasen los vientos afayaízos. Esta creyencia ta perespardíu por tol mundiu ente la xente mariñana.

Hermanu d’armes

Dientro la cultura marítima tiense al barcu comu algo vivo en simbiosis col marín. El dai nomes a los barcos, el dai tratamiento de mujer como fain los ingleses, el tiempo que un pasa embarcáu, munchu mayor que el que pasa en tierra, dain del barcu en braeru hermanu d’armes, un camará embarcáu na mesma aventura marítima y que cuerre los mesmos peligros.

Como bon hermanu d’armes el barcu siempre tien que tar presente nes nueses cellebraciones y folixes como un más. Yo mesmu tengo visto comu manches vegaes, al abrir una botella de ron o whisky, el primer tragu nun ye pal Capitán, ye pal barcu. Abierta la botella echase el primer culín de la botella nun requexu del barcu pa que tenga la so parte. Ufierta, votu o camaradería, quien sabe.

Güeyos y ayos

El mal de güeyu ye’l orixe de milenta males que hestoricamente afeutaben a les persones en cualesquier circunstancia y llugar. Entá güei la esistencia de güeyadores y desgüeyadores ye bien afayaíza. La protección escontra’l mal de güeyu danla los amuletos. Asina n’Asturies tenemos comu’l más importante que non l’únicu, el puñín o la cigüa. Nos barcos tamién los hai, pero con tola importancia y presencia que el mal de güeyu tien na sociedá atlántica, los principales amuletos que puen atopase nos barcos pa protexelos de maldiciones tienen orixen mediterráneu. Estos tienen forma de güeyu, de collores azules, blancos ya amariellos principalmente. Asina ye vezu que les embarcaciones de los pescadores mediterraneos, dende Turquía fasta Arxelia, Italia o Malta, lleven pintaos unos güeyos nos cascos, nes amuraes. Estos güeyos tienen muncha afinidá nel so trazu, lo que apunta a un orixe común, quiciaes feniciu, por ser ellos el gran pueblu mariñán del mediterráneu amás de nexo que xune tolos pueblos nos que entá tien presencia esta imaxería.


Güeyos asemeyaos tamién puen atopase nos cayucos colos que pesquen la xente en Mauritania o Senegal. Si el orixe ye’l mesmu, si foi importáu de los pueblos vecinos del norte o si tien orixe local ye daqué que se me escapa.

Nos barcos construyíos en Turquía, amás de un bon montón de estropicios, nun pue faltar nunca el güeyu turcu. Esti suel tar por el puente, manches vegaes escondíu, col enfotu de proteger al barcu y a los que dientru tan. De los cuatru barcos fechos en astilleros turcos nos que tuve navegando atopé’l güeyu nos cuatru.



Si, supuestamente, los fenicios foron dexando’l so sellu na herencia cultural marítima mediterránea los gallegos fixeron un poco lo mesmo na hispana. La so masiva presencia ente la xente de mar fizo que manches de les creyencies a les que son tan daos quedaren fincaes na tradición marinera. Asina, col enfotu de esconxurar el mal de güeyu nun barcu, el remediu gallegu ye’l ayu machu. El ayu machu (yo nun se reconocela pero ellos son quien a facelo) tien que ponese nos llugares que un quiera proteger, pero tienen efectos llimitaos. Si ponemos ún nel control de carga d’un petroleru namás que taremos dandoi cobertoria máxica a los medios de carga/descarga. Si queremos proteger tendremos que dir semando tol barcu d’ayos machu: puente de mandu, pasiellos, cámares, sala de máquines o pañoles. Esta creyencia ye muy local, pero de fondu raigañu nel territorio vecín. Resulta curioso tratai de desplicái a un inspector de capitanía marítima en Holanda o Estaos Xuníos, que aquellos ayos que cuelguen por cualesquier requexu son pa esconxurar oscures maldiciones y que na tien que ver col miéu a los vampiros.

En fin, que mancho más podía escribise de les zunes y rareces que pueblen les mentes d’esa raza de perros verdes que pasen la mayor parte de la so vida zarraos nun barcu diendo d’un llau a otru del mundiu llevando y trayendo de too lo que la xente de tierra necesita pal so bien vivir.