Corría l’añu 1033 nel Reinu
d’Asturies. El soberanu del únicu reinu cristianu que remanecía na antigua
Hispania visigótica, Bermudu III, concedía un privilexu especial d’exención
d’impuestos, concesión d’hidalguía y llibertá de servidumbre a los vecinos del
territoriu al sur de lo que güei ye’l conceyu teberganu, a les aldegues de
Parmu, La Foceil.la y Vil.ladesú en agradecimientu pol sofitu del vasallu llugareñu
Manulfu Bellidu Oiyolís. Durante sieglos constituyose esti pequeñu territoriu
en conceyu independiente que finaría en 1827 al integrase nel conceyu Teberga.
Panorámica del fayéu |
“Pelayo Froylaz, señor de Páramo, de La
Focella, y de otros lugares en Asturias, fue muy rico y valeroso, y según se
colige del Privilegio que llaman del Páramo, parece que tuvo cargos y oficios
honrosos de este rey (Alfonso V), y que su cavalleriço mayor, llamado
Assemenide, con un falso testimonio, hizo que el rey mandase prender a Pelayo
Froylez; y no pudiendo justificarlo, lo mandó soltar, dando al rey algunos
vasallos suyos, como en rehenes, entre los quales le dio un vasallo honrado,
que llama el privilegio Manulfo Bellido Oiyolís, el qual hizo conocer de
persona a persona a Assemenide, que avía sido falso testimonio lo que contra su
señor avía dicho al rey; con lo qual bolvió Pelayo Froylez a la gracia antigua,
y se le restituyeron sus honras, y fue assimismo después de este rey, muy
privado del rey D. Bermudo (III), su hijo, y alcançó dél la gracia del
privilegio de hidalguía y libertad de toda servidumbre para su leal vasallo y
todos sus descendientes, que hasta nuestros días se guarda.” (L.A. de
Carvallo, Antigüedades y cosas memorables del Principado de Asturias).
Esi
terrotoriu, güei escasamente pobláu, acueye ún de los tesoros naturales más
fermosos d’Asturies, el fayéu de Montegrande, la tercera biesca d’Asturies tres
les de Muniellos y Peloñu, y que formen parte del Parque Nacional de Les
Ubiñes.
La
masa boscosa cuerre paralela a la peña Sobia, na llende oeste del ríu del Val de San Pedru,
rodiando la foz de la Estrechura. Carbayos, xardones, espineres, castaños,
ablanos, argomenos acompanguen en menor midía al rei indiscutible d’esta
biesca, la faya, de la que puén alcontrase exemplares centenarios ensín
dificultá.
Dellos
son los caminos que percorren la biesca xuniendo brañes, pastos, pueblinos y
fontes. Caleyes que permiten visitar maravíes como la fervenza del Xiblu, un
conxuntu de tres fervences que salven un desnivel de 100 metros, algamando la
mayor un altor de 30 metros. Tamién nos permiten siguir el rastru que dexa’l
xabalí. O los reis de la fauna d’estos montes, l’osu ya’l gallu montés. Pero’l
braeru protagonista ye’l árbole, la biesca que medra a la solombra de les peñes
calices.
Dexáse
llevar al debalu baxo la lluz entemecía del final de la seronda, arrastrando
los pies nun mar de fueyes muertes ente les que medren milenta setes. Pasear a
la vera muries verdiegues de mofu y palpar el verdín que cubre los tueros de
los árboles más vieyos. Adientrase nel reinu del busgosu y sentise un foriatu
invasor violando la virxinidá del monte, en silenciu. Guardando’l respetu que
ún siente al vese somorguiáu ente los xigantes vexetales que gobiernen estos
montes dende sieglos atrás.
Ye
prestoso sentir que entá queden llugares nos que’l home ye ayenu: dalgunos
visitantes, unos pocos pastores, los pocos vecinos que entá siguen enrraigoñaos
a esti territoriu hostil.
Si
n’aquel sieglu XI foi concedío a la xente el privilexu de ser homes llibres,
güei el privilexu tenemoslu toos al saber que entá queden llugares como esi qu’esfrutar
por nos.