Guetar n'esti blogue

domingo, 29 de junio de 2014

El Torruxón de Peñerúes



Adiéntrase la carretera pol conceyu Morcín. Atrás quedó Sotu de Ribera, au se mesten les agües de los dos ríos con más alma minera d’esta tierra, el Nalón ya’l Caudal. Atrás queda Argame y, abriéndose a los pies de la Mostayal, nes estribaciones septentrionales del Aramu, el banzáu de los Alfilorios, el que-i quita la sede a Uviéu, una pequeña mar creada pol home ente los montes.

El torruxón de Peñerúes. Abaxo el pueblu d'El Campu ya'l aniciu del banzáu de los Alfilorios.
 
Llegados al Campu vémosla destacase nes altures más prósimes, xixilante silente del pasu ente la cuenca media del Nalón y les altures de los valles del Trubia. Ruines que guarden la maxestá de les almenes señalando’l cielu.

Muries arruinaes que dexen constancia de la hestoria de aquellos valles pindios, de monte baxu que medra abegosu ente’l calizu, de pastiales pa’l ganáu. Tierra probe que nun pasáu llonxanu constituyeren el Cotu de Peñerúes, ún de los munchos cotos señoriales que se repartieren pola xeografía asturiana na dómina medieval. Entá güei resuenen ente los sillares que remanen en pie, ente los vanos de les ventanes, nes mesmes saeteres que amenacen al vacíu, los antiguos sones de la vieya nobleza astur, los Rodriguez d’Argüelles o los que, comu bien rezaba’l so lema, diben dempués de Dios, los miembros de la casa Quirós.

Llienzos E y N del turruxón.

Vista del interior del  turruxón dende'l Sur. Apreciense pernidies les tres saeteres ya'l balcón del llienzu norte, asina comu los güecos pa les travieses que sofitaben los pisos de maera.


Ye creyencia perespardía que’l orixe del turruxón alcuéntrase nos tiempos de los romanos, nuna d’aquelles torres y castiellos colos que controlaben territorios y víes de comunicación, munches de les cuales foron orixe pa bona parte de les construcciones militares altumedievales. El Rei astur Ordoñu I ya-i hubiere fecho reforma de la fortaleza alló pol sieglu IX. Ensín embargu, los restos que güei se ven corresponderíen a una fábrica en tornu a los sieglos XIV y XV.

Cunten les cróniques que en 1417 el Cotu, y con elli el turruxón, foron vendíos por Xuán Bernardo de Quirós al so xenru Gonzalu Rodríguez d’Argüelles, contaor del Rei Juan II de Castiella. Los avatares hestóricos fadríen que’l Cotu tuviere tamién en manes de la mitra uvieína, pero cola desamortización relixosa que se fexo a finales del sieglu XVI (1577), tornaría a manes de la familia Argüelles. Esta familia, los Argüelles, caltendrán el control del Cotu gracies a la institución de un mayoralgu que tresmitía el señoríu enteru al heriedu ensín necesidá de particiones ulteriores. Esta familia, brazu armáu de los Quirós nes sos engarradielles colos Miranda, apaecerán d’ún mou u otru lligaos a la hestoria del Cotu hasta la so disolución ya nel sieglu XIX (1827), cola desapaición de les estructures del Antigüu Rexime y la inclusión de tolos cotos señoriales dientru los conceyos, non ensín dura llucha cola rancia nobleza que non quería perder los sos privilexos.

El Campu ya'l banzáu los Alfilorios. Estos pueblos y valles pertenecíen al Cotu de Peñerúes.


Dexando les páxines d’Hestoria a un lláu, entá güei xuben caminos cenciellos hasta’l altu nel que érguesen les ruines, bien dende’l mesmu pueblu del Campu, dende’l vieyu camín a Pedroveya, o bien dende’l barriu del Palaciu, nome que per si mesmu dexa bien a les clares lo que ellí hebo n’aquellos tiempos nos que’l señor del Cotu, el home que poseía la titularidá de tolos bienes raíces asitiaos ellí, exercía el so gobiernu. 

El turruxón, a diferencia de munches otres fortaleces medievales, arruinaes por entós pa evitar rebeliones de llevantiscos caballeros, asaltos de condes bandoleros u obiespos podríos pola avaricia, caltébose en pié hasta hai cosa d’ún sieglu. La so ruina vieno de manu del abandonu ya’l tiempu. Los restos que queden güei, bien consolidaos, entá permitennos albidrar lo que un díi foi aquel turruxón. 

Llevántense los restos nun altín 100 metros penriba’l pueblu, sicasí, faiseme estrañu el llugar escoyíu, pues otres altures mayores espárdense en direición NE-SW, controlando la mesma torre que quedaría baxo’l tiru del enemigu que la quisiere asaltar. Esto faime camentar que’l emplegu militar taría amenorgáu pol de meru control del territoriu, braera amuesa del poder del señor feudal, más que constituir un ellementu diseñáu pa sostener una defensa férrea de la mesma.

El Turruxón vistu dende los altos al NO. Vese abaxu a mandrecha parte del fosu que arrodiaba el torruxón.


Les ruines caltienen un llienzu enteru de les muries, el Norte. Del Este ya’l Oeste queden pocos restos. El Sur esbarrumbose dafechu, allimentando colos sos materiales les muries de praos y cases. Distínguese perbien tamién, sobre tóu polos llaos Sur ya Oeste, el tarazu en tierra de lo que fuere’l fosu, parcialmente colmatáu colos años, y que, al xeitu tradicional n’estes construcciones, daría pasu a una empalizá de maera que arrodiaría la torre.

La entrá principal del turruxón nun se conserva. Taba nel llau Sur. De otra entrá secondaría, nel llienzu Este, remana parte del arcu. Delles saeteres, un balconín y dalgún ventanu afuren los grueses muries, con más de dos metros de cantería, argamasa y piedra. Los güecos de les travieses de maera dexen nidia güelga de los tres pisos con los que cuntaba.
 
Na parte baxa del llienzu E albidrase entá parte de les piedres que formaben el arcu de la segunda entrá a la fortificación.

Güecu del balcón y saetera nel llienzu N.


Préstame, cuandu visito estos llugares, zarrar un puquiñín los güeyos. Dexar de llau por un momentu la hestoria, los documentos escritos, los ellementos arquitectónicos. Y dexarme llevar pola mística y la lleenda, pol romanticismu que la distancia temporal nos apurre de tiempos que, de xuru, non lo foron tantu. Viaxar a un tiempu nel que’l valle, verde, nun tinía un banzáu anegando los praos. Un tiempu nel que entá nun se víen tantes construcciones, nin el fumu de les chimenees de la térmica. Un tiempu nel que ún miraba la inconfundible silueta del Picu Magdalena, el Monsacru, y tremaban-i los corales, engurriase-i el espíritu. Un tiempu nel que’l home yera bien pequeñu, y esos montes bien grandes y poderosos. Y eses muries de piedra, plenes y llozanes, apurríen la so solombra a vecinos medrosos, a tapecíos bandidos y a belicosos caballeros.

El camín que xube al turruxón, un caleyu que asciende sele ente castaños.

5 comentarios:

  1. Preciosos paisajes lastima no entender lo que quieres contar.

    ResponderEliminar
    Respuestas
    1. En el blog alterno entradas en castellano con otras en asturiano. Siento que no lo entiendas pero espero que al menos las fotografías te hayan gustado.

      Eliminar
  2. Norabona pol relatu collaciu, per prestosu.

    ResponderEliminar
  3. Visita que tengo pendiente va muncho, pero saliendo de Campo, que ye'l topónimu oficial, que non por acabar en u un topónimu ye más asturianu, hailos que tamién acaben en o y nun pasa nada, falase asina. En Morcín acaben en u los que tienen metafonía (El Tixu, El Siirru, etc.) y pocos más (El Recuestru, L'Ablaneru), el resto ye con o (El Palacio, L'Otero, Castandiello, etc.). Hai que poner más procuru pa cola toponimia.

    ResponderEliminar